نظام التصحيح الالكتروني خطوة فاشلة على حساب مستقبل طلاب 12

بسم الله الرحمن الرحيم

معاناة 12

نبدا السنة الاخيرة على اساس انها السنة المنتظرة من 11 سنة و هي السنة اللي نعتمد عليها
عشان نحقق احلامنا و كلنا امل ان راح نجتهد و نبذل الاحسن عشان خاطر الاهل و عشان المستقبل
اللي يكونوا فخورين فينا ان نحن وصلنا للمرحلة النهائية من الدراسة المدرسية

ضغط و تعب و ارهاق و كيلو حبوب صداع و كل يوم سهر عشان المستقبل
تسع مواد و كل مادة لها واجباتها و امتحاناتها و انشطتها و اسئلتها القصيرة و تنظيم الدفاتر

ما نذوق طعم الراحة ما نذوق طعم النوم وجوهنا شاحبة من الارهاق و ملامحنا مختفية من التعب عشان المستقبل

و الاهل مع انهم يشفقون علينا عالتعب اللي نحن فيه و لكن صبورين عشان ان القادم افضل
و في اخر الفصل مع ان نكون منهكين و طاقاتنا منتهية لكن نشد الهمة عشان المستقبل
و الضغط اكبر حتى نخلص المناهج بسرعة

تبدا فترة اجازة الامتحانات مذاكرة متواصلة بلا راحة لا اكل و لا نوم و الاعصاب واصلة حدها
و الضغط مرتفع و من الضغط المتواصل نتعرض لحالات نفسية لكن نستحمل عشان المستقبل

و يوميا نروح الامتحان عاد الامتحان تحطيم و اسئلة من المريخ و الطالب ما يعرف يصيح و لا
يضحك من القهر و لا يجرب حظه و يحل و امره لله و يطلع من الامتحان و هو محبط و محطم
ما يعرف يفكر في الامتحان و لا يذاكر المادة اللي بعدها لكن صامدون عشان المستقبل

نعدي هاذي المرحلة و نحن ما فينا ذرة طاقة لا نفسياو لا جسديا و الاجازة اسبوع نقعد فيها
نتعافى نفسيا و جسديا حتى ما فينا طاقة نطلع نتمشى نغير جو و كل تفكيرنا في الامتحان و
كيف حلينا و شو سوينا ما نتهنى بالاجازة نهائيا و نواجه مباشرة هم الفصل الثاني لكن اللي يصبرنا
المستقبل

و نحن ننتظر النتائج و شو حققنا و وين المصير
متى النتائج ؟ بعد اسبوعين ..متى النتائج؟ صبروا ما خلصنا التصحيح .. ليش تأخرتوا في التصحيح
و الله النظام خربان .. كيف متى النتائج ؟لحظة لحظة بعده
بعد شهرين ..
ابشروا نتائجكم يوم الخميس الساعة 8 و نص بليل ... اخييييييرااااااا !!!

نتائج 12 يوم الخميس .. النتائج بتطلع ..

و حل اليوم المنتظر و الطلاب متوترين و مالهم نفس يدرسون
و القلوب ترتجف و الاهالي ينتظرون بفارغ الصبر

اليوم النتائج ..

طلعت النتائج ..
و المستقبل اللي صبرناله تبخر انمسحت الصورة تماما
في لمحة بصر طات احلامنا و انهدم اللي بنيناه ف مخيلاتنا و كل هذا ع الفاضي ..
حتى ما قادرين نراوي اشكالنا لاهالينا .. شو نقولهم ؟ كيف نفهمهم ؟
دموع و حالة نفسية هستيرية و نقترب من حالة الجنون
من القهر و الصدمة ما عارفين نضحك و لا نصيح و لا ننتحر
حتى لو انتحرنا ترا المصير جهنم و محد بيسويلنا شي

و في النهاية يجينا احد يقولنا بكل برود ..شنسوي ترا التصحيح خربان
و هذا نصيبكم و محد يقدر يخالف مشيئة الرب

اوك دخلونا كلنا ف الجامعات اللي نباها و نكون بمشيئة الله حققنا اللي نريده
و محد يخالف مشيئة الله

بس لا على اساس نحن ناس متطورين مسويلنا تصحيح الكتروني و تكنولوجيا متقدمة

يا عمي تكنولوجيا متطورة على حساب مستقبلي ليش ؟
و احين انا شسوي و نسبتي ع الارض
ردولنا التصحيح اليدوي و لا تسوون فيها متطورين
قسما بالله الظلم واضح وضوح الشمس و محد يقدر ينكر ان نحن انظلمنا
و لا تطلعولنا اعذار تراكم هدمتوا كل شي

و احين لان نسبتي طاحت انا مضطرة اني اعيد ثاني عشر مرة ثانية
عشان ادش التخصص اللي اريده

و لا تقولون شي فصل ثاني و بنعوض ترا حتى لو عوضت ما بيكفي عشان اوصل
للحلم اللي كافحت عشانه سنة كاملة ع الفاضي
و ابشركم ضاعت سنة من عمري ع الفاضي
ليش ؟ لان نحن متطورين و لازم تصحيح الكتروني و هاذي غلطة النظام ما غلطة الوزارة

و لا تنسون انه لا حجاب بين المظلوم و ربه و دعوة المظلوم مستجابة


*** منقول ***
لمتابعة أكثر خارج موقع مسندم.نت...
نرجو زيارة هذا الرابط (( بالضغط هنـــا )) ..