باجر ورانا اختبار😢📖! لازم نسهر🙋

السلام عليكم ورحمة الله


اتوقع الاغلب بعد يوم او اسبوع او شهر حتى بيكون عنده اختبار ولازم يذاكر له !!

طبعا كل شخص له طريقته اللي متعود عليها في المذاكره واللي اكيد بتختلف من طريقتي وطريقة صديقي وطريقة اخوي عن طريقته!!

ما سويت الموضوع عن طرق المذاكرة وافضلها
عارفه ان الكل يمكن مل من هذي المواضيع وعارفنها

بس الشيء اللي اهم من طريقة المذاكرة هو عقلك وانت تذاكر وين؟!

هل هو سليم ومركز ولا بس جالس تعبيه وبس توصل للاختبار تعبئته تكون فاضيه وواصله الصفر؟؟

اكثر خطأ تسووه. تروحو الاختبار ما نايمين! انا اقولكم بتقولو ما مخلصين مذاكرين! طيب وين افضل تحل 7 اسئله من 10 وصح ولا تحل 10 اسئله من 10 وتجيب 5 هنا النقطه!!!


اللي يصدمني ان طالب عنده اختبار رياضيات او كيميا او فيزياء اختبار يحتاج يكون عقلك مرتاح ما تكون رايح مواصل ( مسائل واثباتات وتفكير) طول الليل توصل لورقة الاختبار من كثر التعب ما تقدر حتى تركز والسبب؟!

سهران وشارب لي رد بول عشان ينشطني؟؟؟! ويوم جيت بنام لي ساعتين ما قدرت!!

انتو قريتو عن هذي المنشطات اللي قاعدين تاكلوها فترة الاختبارات بس عشان تخلصو الكمية؟!!
ترا ابد ما تعطيكم طاقه ونشاط ،، ابدا ما تفتح لكم عقلكم وبالعكس تزيد من التوتر اللي اتوقع 90٪ من الطلاب يعانون منه فترة الاختبارات وتزيد من الارق! ف مواد الحفظ ممكن تقدرو تمشو وتحلو لكن ف اختبارات الفهم مستحيل تكون درجتكم زينه نفس لو كنتو ما تستخدموها ،،



طبعا اكثر شي الطلاب يشربوها ( نسكافيه ، شاي ، بندول ، في ناس تاخذ رد بول) والبيبسي والكاكولا


^هذي اكثر الاشياء اللي المفروض ابد ما تاخذوه البندول ما كل الانواع ((بندول اكسترا )) فترة الاختبارات امتنعو عنه تماما ابد لا تستخدموه يسبب ارق وعدم النوم لان فيه كافيين بامكانكم تستخدمو بندول ادفانس وايد زين حال كل شي ،،
والباقيات هم يقولو بعد العصر لاتشربوها عشان تقدرو تنامو وانا اقولكم بعد الساعه 12 الظهر ولا الماكس 3 ظهر بقدر الامكان لا تاخذو بالذات النسكافيه بس الشاي العمانيين المغرب ما يطيعو عليه وما وايد يأثر بحكم ان الجسم متعود عليه ،، بس ما تسهرو وجنبكم دلة الشاي!!



اذا تريدو تتنشطو وتسهرو كلو لكم تفاحه اللي فيها ينشطك اكثر. عن النسكافيه ولو جيت بتنام ما بتسبب لك ارق حتى قبل تروحو الاختبار كلو حبة تفاحه وكثرو من الفواكه والخضار فترة الاختبارات والتمر والرطب والمكسرات بس اللي عنده انيميا الفول لايقرب صوب المكسرات هذي اشياء كلها افضل من الحبوب واشياء الدكان الثانيه هي كلها فترة اختبارات جربو وشوفو كيف وبس حطو ف بالكم انها اشياء زينه وبتشوفو النتيجه ---

والاهم من هذا كله لو باقيلكم وااايد وما مخلصين لا تروحو اختبار وانتو ما نايمين لا تروحو الاختبار ومواصلين ماراح تجيبو اكثر بتجيبو اقل عن لو كنتو نايمين طبيعي جلسه ف الكرسي 3 ساعات متبعه يحتاج لها يكون جسمك ما تعبان ومرهق --


دايما نسمع ماشاءالله عليها تذاكر وتدح وولد الجيران الثاني مايذاكر ربع مذاكرتها وجاايب اكثر منها؟؟! ويش السبب ؟

هي تروح متوتره وخايفه ومواصله وخلاص عقلها مرهق وهو يروح شبعان نوم بيجيه السؤال بيفكر فيه بعقل متفتح اكثر منها!! ما قاعده اقول سوو نفسه بس الاعتدال بترتاحو كثير وبتحصلو نتيجه للمذاكرة اما تضيعو جهدكم على اشياء نفس هذي ،،


اتمنى تاخذون الموضوع بجد وتستفيدو منه))

وموفقين بإذن الله


*** منقول ***
لمتابعة أكثر خارج موقع مسندم.نت...
نرجو زيارة هذا الرابط (( بالضغط هنـــا )) ..