قصيدة "أطياف السراب"

يا كثر من يسهر على خـطّ السطور
يكتب عسى ينسى جروحه والمصاب

يخفـي شـعـوره بـيـن أشعــارٍ تــدور
في دايـرة شوقه لخـلٍّ عـنـه غــــاب

حتى القلم ما عاد يوصف هـالشعور
وشلون يوصف بالحبر طعم العذاب

دمعـه تحـوّل بـالحـزن مـهـلٍ يـثـور
وأطياف خلّه أبعدت عنـه الصـواب

ساري ومتماسك وبأوجاعه صبــور
يحلـم ولا يـدري بـأن حلمـه سـراب

تايه بـفكـره والجسم سـجـل حضـور
وأصبح قصيده مأكله وأحلا شـراب

شاف البـدر ساطع وشافٍ للصــدور
بـس العنـى كان المسيطـر والجـواب

حتّى على ضحك الطفل صاير غيور
وبينه وبين الضحـك صخـر وتـراب

كره البكى خلَّ الصمت يبني جسـور
وتـهـدمت آمـالـه وصـارت خـــراب

حـبـل المحبّـه ضـايـعٍ غـطّــاه ســور
والســـور يـكـبـر لا تــولّاه الغـيــاب

حب الـولـه يكبـر على مـر العصـور
شابت هذوبه والصـدر بالشوق شاب

وذات لـيـلـة إكـتـشف سـر القصـور
وصـار يعرف عن خليله ليه غــاب

أدرك بــأن المصلحـة مـثـل القـبـور
حنّا بنبـنـي والعمر يطـوي الحـسـاب

ضـاعــت سنيـنـه بإنتظــاره للعبــور
حتى عـبر لكن عـبـوره بـالـعـتـــاب

حتى طيوفـه شـيـدت فـيـنـي قـصـور
تشفق على صبري وتكـبـر بارتيـاب

الله يجـازي مـن يخونـك يــا شـعــور
والله يجازي مــن تلاعب بـالجــواب

روح وتهنــى بـالعـمـر والله غـفــور
علـمـتـنـي درسٍ وأفعـالـك كـتــــاب

يا ما كتبنا بالشـعـر أرقـى الـسـطـور
واليوم نكتب يا عسى ننسى المصاب

يا ما شرحنا بالشعـر أعـذب شعــور
واليـوم نشرح عـن جريمات الغيـاب

كلمات:
حسان الحوسني


*** منقول ***
لمتابعة أكثر خارج موقع مسندم.نت...
نرجو زيارة هذا الرابط (( بالضغط هنـــا )) ..