معلومات للمتوجهين لاجراء اختبار القبول في تخصص التربية الفنية

معلومات للمتوجهين لإجراء اختبار القدرات في تخصص التربية الفنية في جامعة السلطان قابوس

اختبار القدرات في التربية الفنية..الاختبار يتكون من ثلاثة اجزاء:
[رسم + مقابلة + اختبار عمى الألوان]

اول شيء الرسم ..
يعطوكم كل الادوات ورقة اكبر عن حجم A3 بشوي تقريبا مع قلم رصاص وممحاه وانتم احتياطي خذوا معكم ممحاه ومبراه والرسم يكون بقلم الرصاص وهم يعطوكم وقت محدد للرسم اكثر عن ساعتين تقريبا
بالنسبة للرسم هم يعطوكم موضوع محدد لرسمه مثلا على دفعتنا نحن كان المطلوب طبيعة او رسم بيئة من البيئات العمانية المتنوعة (دفعة 2011)
ومن بعده هالسنة كانت المواضيع كالتالي :
احتفال القرنقشوه .. الهبطة .. الأسواق العمانية .. احتفال ولايتك بعودة السلطان قابوس ..
ولازم تراعي في الرسمه الظل والنور وفيها (عنصر انساني) لازم يعني ترسم انسان ..وايضا ركزوا على رسم الملامس للعناصر ..
مثلا انا اخترت الطبيعة الزراعية رسمت رجل طالع في النخلة وكذا يعني
وبعد شيء ثاني مهم لاحد يستخدم الكلنكس[المحارم الورقية]او اصابعه عشان يمسح او يسوي ظل به لأنه هذا يعتبروه غش فلازم كل التظليل فقط بالقلم الرصاص والرسمه بشكل عام تكوينها وعناصرها مترابطه تعبر عن موضوع محدد ..

**اما بالنسبة للمقابلة يسألوكم عن معلومات تخص الفن مثلا عن المدارس الفنية الكلاسيكية والواقعية...ألخ وبعد عن الفنانين العمانيين والعالميين وعن الألوان ايش خصائصها كذا يعني مثلا انا سألوني عن ايش الألوان اللي استخدمتها من بديت ارسم وعلى وين رسمت عالورق ولا القماش ولا الجدار المهم ف المقابلة يكون عندك ثقافة وتبين للي يسويلك المقابله انك واثق من نفسك ولا تخجل يعني هيأوا أنفسكم لمقابلة ممتازة وبعض الطلاب ياخذو معهم اعمالهم الفنية يراوها الدكاتره بس ما شرط تاخذ انت ..
وعلى فكرة المقابلة تصير وانتو ترسموا يعني الدكاتره يمروا عليكم .. وعادي الموضوع طبيعي يعني ..

**اختبار عمى الألوان اختبار سهل تحصلوه ف النت نفس اختبار فحص النظر مال زمان سكر عين وافتح عين وكذا ..
يعني أشياء سهله جدا ..بس ركزوا على الرسم بشكل كبير لأنه هو الأساس ..
وأي استفسار آخر انا جاهزة ...
وربي يوفقكم جميعا...


*** منقول ***
لمتابعة أكثر خارج موقع مسندم.نت...
نرجو زيارة هذا الرابط (( بالضغط هنـــا )) ..