اولا هى حزينة ثانيا بتفكرنا بحاجة مش واخدين بالنا منها ثالثا هى منقولة

انا جاية احكيلكم موقف حصل لى النهاردة وهو موقف فريد من نوعه
فحبيت افضفض معاكم بيه ويارب مكنش ضيفة تقيلة على القسم دة

وانا فى السوق باشترى الفطار النهاردة شوفت ست بتعمل حاجة غريبة او على الاقل بالنسبالى غريبة
لانى عادتا ما بنزلش السوق الا نادر جدا

المهم انا باشترى الطماطم فلاحظت ست بتلم شوية طماطم من على الارض كانوا مرميين ورا البياع
فاستغربت لكن قولت عادى جايز عندها بط او فراخ بتاخدهم ليهم

فلقيت الراجل البياع لما شافها راح حاطط قد كيلو طماطم فى كيس وقالها " خدى يا بركة وكل سنة وانتى طيبة "
فلقتنى باساله هى الست دى حضرتك تعرفها ؟ قاللى اه !!
دى بتيجى كل يوم تلم اكلها من كل فرش فى السوق وتمشي قولتله بتسسول الاكل قاللى لا
دى تيجى على الفرش اللى بيرمى اى حاجة وتاخدها وتمشي ولو مكنش واحد ابن حلال تصعب عليه
يديها اي حاجة طازة بتروح واخدة اللى على الارض وماشية

لا حول ولا قوة الا بالله العلى العظيم
بكيت من كلام الرجل وقاللى " دة من دة ياما يا مدام ربنا يوسع عليهم "
روحت سيبت الراجل وجريت على الست وحاولت اديلها فلوس قالتلى لا والله ما باخد فلوس
انا مش شحاته يا بنتى
انا بس اخد اللقيمات اللى تسد جوعى والحمد لله على نعمة الصحة

لقتنى بقول فى سرى يااااه الله يوسع على كل فقير يارب
قولتلها طيب اسمحيلي اوصلك ولو انتى عايزة تدخلى الفرحة على قلبى يبقى تيجى تفطرى عندى النهاردة
الست بصت لي وبعدين بصت على هدومها وقالتلى يا مدام اللى زيي يوسخ للى زيك الفرش !!!

يا الله ليه يا امى كدة دة انتى تشرفينى والله قولتلها كدة وانا بحاول ادارى عينى منها
قالت لى يا بنتى رحم الله اللى يعرف قدر نفسه
فصممت انها تيجى معايا البيت وتفطر معانا لكنها رفضت تماما وقالتلى ربنا يكرمك ما تحرجينى

قولتها خلاص هوصلك لبيتك ممكن ؟
قالتلى ماشي وفعلا خدتها وروحت معاها البيت " ومحدش يقوللى ازاى تروحى مع حد غريب "
لان المؤمن كيس فطن وكمان انا ضميري ونيتى كانوا شايلين لها الخير ودة مش معناه انى ما خوفتش للحظة كدة
لكن قولت اللهم انى استودعك نفسي وعرضى فاحفظهم بعينك التى لا تنام وقعدت اردد الدعاء فى سرى

المهم وصلتها لبيتها اللى هو شقة ارضى قريبة من السوق تقريبا اوضة وحمام وعلى قد بساطتها عل قد ماهى نضيفة
وسيبتلها من فضل الله اللى ربنا قدره ليها واستئذنتها انى اجى ازورها من وقت للتانى
ومشيت وانا على قد حزنى علشانها على قد ما انا فخورة بعزة نفسها

نيجى بقى للاهم من كل دة
انى لما روحت بيتى ووانا باشيل الاكل فى التلاجة و على الرخامة وكدة
لقتنى باعيط بحرقة على حالنا

عندنا من الخير الكتييييييييييير ومحدش عاجبه حاله ودايما نبص للى فى ايد غيرنا مع ان فى غيرنا
برضو محتاااااج زى الست دى وكتييير زيها او اكتر منها كمان
الست دى مكنتش بتدور على فرش بيبيع طماطم رخيصة دى كانت بتدور على ومتاسفة انى اكتبها كدة
" زبالتنا "

ايوة يا اختى انتى بتقفى تنقى من وسط الثمار اللى على كيفك وتخيلي فى ناس بتدور على اللى بيترمى على جنب علشان تاخده وتروح بيتها بيه لا اله الا الله

اللى عايزة اقولهلكم ان فى نعم كتير فى حياتنا تستحق الشكر و الحمد
وكمان احنا لينا دور فى التغيير وانا لما شوفت الست دى لا لعنت مبارك وايامه ولا حملت المسؤلية على الدكتور مرسي

لكن حسيت بواجب عليا وحسيت انى مقصرة فى حق غيري وقررت حاجات كتيرة بمشاركة جوزى طبعا

وانا لسة راجعة انا وهو وولادى كمان من عند الست دى دلوقت
ومش
عايزة اقولكم قد ايه الست كانت فرحانة بوجودنا وقد ايه فرحتها ان فى حد قدرها رفع من روحها المعنوية ازاى
وعرفنا منها انها معندهاش اولاد وجوزها ميت من 20 سنة ومعندهاش اى عائل او مورد
وان شاء الله ربنا هيقدم لها اللى فيه الخير
وانا نويت
ان ليها زيارة عندى كل يومين بامر الله
وفضله

و الحمد لله على نعم الله علينا يارب لك الحمد كما ينبغى لجلال وجهك وعظيم سلطانك

حبيت انقلكم تجربتى دى لعل يكون فيها افادة لحد فيكم ويكون لى اجر الدال على الخير كفاعله والله المستعان

استودعكم الله الذى لا تضيع ودائعه
منقولة

*** منقول ***