تستحق السلامه أستاذنا أبو الفاروق ..قصيدتين الأولى إهداء والثانيه تتحدث عن نفسها

مساكم ألق أيها الأحبه
سأفتتح نصي القادم بنص كتبته إهداء للأستاذ والشاعر القدير عبدالله الغافري أبو الفاروق بعد خروجه سالما من مستشفى الجامعه بعد إجراء عمليه جراحيه له
نتمنى له دوام الصحه والعافيه

يا رفيع المعاني تستحق السلامه
يا أصول الرجوله يا شعور الوفا

منبع الطيب ...ناسك كلها مستهامه
غبت أسبوع عنها طرفها ما غفى

المرض دق بابك سل يمك حسامه
والدعاء من قلوب أحبابك اللي شفى

كن دارك تساوى صبحها مع ظلامه
عن جميع البرايا حزنها ما خفى

مو "يقا" كنت أقصد بس هذه علامه
كل وادي بني غافر بضيقه صفى

يا ابو الفاروق نشكر ربنا ع السلامه
نورت أرضك الرستاق يوم خبرك لفى

بان دكتورك أصبح حيل يسعد كلامه
وكل قلب بشوفك يالعزيز إحتفى


النص الثاني يحكي عن نفسه ...أتمنى أن يرقى إلى ذائقتكم

واقع مرير







الحلم ماله لا قسى الوقت قيمه
والنفس أضحت من بلاها سقيمه

ناكل ونشرب...بس حتى نواصل
مسيرنا في هالحياة العقيمه

هذا إذا حظ الــ بن آدم رأف به
وأضحت كفوف الرزق عنده كريمه

ولا إذا الواقع غدى معه قاسي
ماله سوى يجمع فتات الوليمه

اللي كبار القوم جابوا ثمنها
من كيس دولة في يديهم غنيمه

بس المصيبه ان كسى الفقر عفه
تخفيه عن عطف القلوب الرحيمه

فــ الركض خلف القوت إحنا إنشغلنا
كل يوم نصحى ع الأماني القديمه

كيف السبيل نطيل في عمر راتب؟؟؟
صارت له الأسعار نده وغريمه

السوق شب وشب قلب المفلس
اللي رجع خايب يجر الهزيمه

عاجز يلبي نصف حاجات بيته
علاقته بالهم صارت حميمه

البنك كابوس يقض المضاجع
يعطي وتالي وقفته ذي وخيمه

ينهش ألين الموت لحم المواطن
عله تنغص عيشته مستديمه

مع الفساد نعيش في حرب كبرى
هذه انتصاراته فــ أرضي عظيمه

صار الذي يتبع حقوقه ...مشاكس
واللي يقول الحق ...قوله نميمه

الغش والسرقه وسم الرشاوي
سهم أصاب المجتمع في صميمه

دام القلم ينصاع لأمر الحرامي
أهدت مشاريع البلد له نعيمه

حتى الغريب وله فــ هالوضع بصمه
درب الطمع قاده لدنيا الجريمه

صحة طفل باتت تهدد بحلوى
فيها طغت كل النوايا اللئيمه

الله لنا ...يده على كل ظالم
ما يعجزه محيي العظام الرميمه

يكتب نهاية من نكر فضل أرضه
يوم الحشر يجزيه نقمة جحيمه

ومن بعد رب العرش... قابوس قادر
يجتث من داره النفوس الغشيمه

بعمان حلق فوق روس المعالي
وأضحى سندها يوم كانت يتيمه

له قلب أكبر من حدود الوسيعه
وله فكر يتمازج ب نظره حكيمه

قابوس شعبك ينتظر بعث حلمه
اضوي بشمسك كون طول سديمه


*** منقول ***
لمتابعة أكثر خارج موقع مسندم.نت...
نرجو زيارة هذا الرابط (( بالضغط هنـــا )) ..