يبة وينـــــــــــــــــك؟؟؟؟؟؟؟

[الحزين دوم]

يبه وينك ..؟؟!!

يبـه وينك ؟؟

ولهت لنظره من عينك....
يبه وينك ؟؟
أشوفه طوّل غيابك !!
و من ودّاك .... ما جابك !!
قالوا ما يدوم الزين !!
و أنا عندي أمل للحين ..
و لا كني أعرفك وين !!

يبه وينك ؟؟
عسى الداعي يبه بس خير ؟!!
عساك بخير....!!
مداين تكرم لعينك...
بس ارجوك علمني...
علمني .. يبه وينك ؟؟

سألت امي عن رجوعك ...
ولا كني اعرفك وين !!
و قالت ..
ما يدوم الزين !!
و أنا .. عندي أمل للحين ..
في رجوعك !!
يبه بس تكفى علمني ....
متى رجوعك ؟؟
يبه بس تكفى علمني .
وش احلى من طلوع اثنين ؟؟
طلوع الشمس.... و طلوعك

يبه وينك ؟؟
سألت أمي ...... غيابك طال ؟؟
ولا كنّي اعرفك وين !!
و قالت مثل ما قالت ..
حسافه...
ما يدوم الزين...
مع كل هذا صدقني ..
أنا عندي أمل للحين !!

سؤالي عنك يالوالد ..
صبح موال
و أشوفه طال...
والله طال ..
حزين .. بلحنه و حروفه...
يخاف .. يموت من خوفه...
و قلب ٍ كان اقوي قلب...
ضعف .. من قسوة ظروفه ..
يبه ..
ارجوك علمني ...
تشوف اللي أنا أشوفه ؟؟
أنا اشوفك نهار و ليل...
في وسط البيت..
و تدعي الرب ييسر لي ..
يبه ..
ما عاد بي من حيل ..
وين الحيل ؟؟
و أنا أشوفك نهار و ليل ..
مع اني ادري ما ترجع !!
غريبه .. بعدها تدمع ..
عيوني من هموم البين !!
و ادريبه مكانك وين !!
مع َ هذا .. ارد و اسأل !!
يبه ....
ووووينك ؟؟
و لا كني اعرفك وين !!

شبكت العشر في غيابك ...
على راس ٍ كساه الشيب ..
و من وداك ... ما جابك ..
و لا ادري وش يخبي الغيب !!
و جرح ٍ عذ ّب أحبابك....
يبه ..عيّا يخف و يطيب !!

يبه.. كل جرح في الدنيا ..
مصيره بالدواء يلتم...
و لكن البلا من جرح ..
نزف فرقاك ... بليّا دم !!
و هذا الفرق في جرحي...
عجز يلقا الدوا دكتور ..
أنا جرحي غريب الطور !!
ينزف ... بس بليّا دم ..
و زاد الهم فوق الهم ...
و دام انك يبه غايب ...
جروح الغيبه ما تـلتم ..
بس عندي امل للحين !!
و لا كنّي اعرفك وين !!

يبه .. ذكراك تفرحني ....
في نفس الوقت تجرحني !!
لا من جبت في طاريك ...
دموعي غصب تفضحني....

يبه .. تذكر زمـــــــــــان ؟؟
ألا يا حيف .... ألا ياحيف ..
زمن قاسي ..
زمن قاسي...
اخذ مني بلا رحمه
اخذ مني اعز ناسي !!
و خلاّ لي سهر هالليل ..
في عيني ضيف ..
الا يا حيف !!

يبه وينك ؟؟
تعال و شوف ...
كبرنا مثل ما تمنيت .
درسنا كل ما حبيت ..
نصلي مثل ما وصيت ..
و ندعي لك في كل ظروف ..

يبه وينك ؟؟
تعال و شوف ..
صحيح الدنيا ما ترحم ..
تجرعنا التعب انواع...
و لكن الأمل ما ضاع ..
و أنا عندي أمل للحين !!
و لا كني اعرفك وين !!

يبه تذكر شطانـتـنا ؟؟
أنا و اخواني...
نلعب في زوايا البيت ..
يبه ... والله انا حنيت ..
لذاك الوقت في وجودك ...
الا يا ريت ... الا ياريت ...
ترجع .. يا يبه حنيت ..
حسافه الدنيا ما ترحم...
خذت منا سعادتنا...
خذتك بعيد .. و خلتنا!!!

نحبك يا يبه ... ارجع
مثل شمس الفجر .. اطلع
حزينه الشمس في غيابك ..
و نفس الحزن في احبابك ..
واخاف الشمس من حزني ..
تغيب و ما بعد تطلع !!
يبه ارجع !!

اذا لي خاطر فـ قلبك ..
تعال و زورنا بس يوم...
مع انه ما يكفينا ..نشوفك يوم ..
نبي حضنك يدفينا .. ونشوفك دوم ..
لكن قلّت الحيله ... ويمكن مـ البطا ضاعت ..
و قلنا يوم !!

يبه سامحني بترخّص ...
قبل ينشف حبر الأقلام ..
كلامي بعده ما خلّص ..
و لكن موعد الأحلام ..
حان ..
ولازم أوفي له..
بعد ما ضاعت الحيله ..
أشوفك والوعد باجر !!
اذا فكّر يجي باجر..!!
و برجع اسألك وينك !!
بس لازم تجاوبني ..
ترى عندي امل للحين !!
و لا كني اعرفك وين .!!

الله يرحـــــــمك يا يبة

ويرحــم أمـــــــوات المســـــــلمين,,ويدخلــــــكم جنــــــــــات الخلـــــــد...

[تآآمْـيے]

زمن قاسي ..
زمن قاسي...
اخذ مني بلا رحمه
اخذ مني اعز ناسي !!
و خلاّ لي سهر هالليل ..
في عيني ضيف ..
الا يا حيف !!

تسلم خيووو الصرااحه رائعه جدا



الله يرحمك يا يبه ويرحم كل امواات المسلمين

[الحزين دوم]

اه اه اه من هالزمن........

[الحزين دوم]

مشكور اختي ع هالمرور

[سمو المعاني]

يسلموووووو كلمات ف قمة الابداع

[الحزين دوم]

مشكوررررررررررين زود

[بلسم]

كلمات حزينة...


الأب ..كلمة تجلب السعادة حينا .



وألما مكبوتا حينا آخر

[قصيد]

متميز بقسم الشعر والخواطر اخوي الحزين دوم

نتريا يديدك

[فتى الجادي]

شكرا اخوي الحزين دوم
على الكلمات الرائعه

[الدرة]

كلمات جميلة على الرغم من ذلك الحزن العميق الذي يغزوها

يعطيك العاااافية

لا عدمنااا جديدكــ