رجيتك منتظر شوفك ولو بأوهام
ودمع العين ع الخدّين له مسرى

حزين وخاطري دونك حشى ما نام
شلون ينام وعيونه غدت قفرى!

أقول اليوم لي يرجع ، ويكمل عام
يطول الليل وأشعاري مع القمرا

ترا يومي عقب فرقاك كنْه أعْوام
وأشوف الأرض دونك كلّها صحرا

ألين العزّ صحّاني من الأحلام
وقال العرْب ما تهلك من الحسرا

خويٍّ يزهلك لا حدّتك الأيام
عسى أرضٍ تجيبه دومها حدرا

وخويٍّ ثار ما يْقول الوعد قدّام
يقول الوعد عندي والزمن أدرى

على كبد السهر واقف وماسك زام
يزوم بمشنقة الأوجاع بالأحرى

عماني بالأصل والذات ، ما ينلام
اذا باع العمر لأجل الخوي يبرا

تربّى في دياره من رجال عْظام
وصيت العزّ في دمّه فتح مجرى

وقابوس المفدّى للوطن محزام
يقول اليوم نفزع ما نجي بُكرا

فعوله بالسما قامت ترفّ أعلام
فعول الحين ما هي أمس أو ذكرى

رسم للعدل ميزانه وللظلّام
تصدّى ، والاشارة واضحة حمرا

واذا ثار العدو حنّا لها بإقدام
نكسّر راس ما له كرّةٍ أخرى

عمان العزّ باقي مجدها مقدام
قلمها الشعب والتاريخ لك يقرا


#حسان_الحوسني


*** منقول ***
لمتابعة أكثر خارج موقع مسندم.نت...
نرجو زيارة هذا الرابط (( بالضغط هنـــا )) ..